Álverð ekki verið lægra frá því í september í fyrra

Verð á áli hefur lækkað talsvert síðustu daga og er nú lægra en verið hefur frá septemberlokum í fyrra. Í Morgunkorni Íslandsbanka kemur fram að við lokun markaða í gær hafi framvirkt verð lækkað um fjórðung frá maíbyrjun.

Í Morgunkorninu segir að meðal ástæðna sem tína megi til fyrir lækkuninni megi nefna nýlega birtar tölur frá Alþjóðaálstofnuninni sem sýna að framleiðsla áls hefur nú náð sama magni og fyrir hrun. Vitnað er til stjórnenda Alcoa sem bentu á það við kynningu á síðasta uppgjöri sínu að líklega væri framboð áls á þessu ári, ef Kína væri undanskilið, um það bil einni milljón tonna tonna umfram eftirspurn þetta árið. „Hins vegar er talið að Kínverjar þurfi á umtalsvert meira áli að halda en framleitt er í landinu, þótt innflutningstölur  þar á bæ hafi ekki endurspeglað það nema að hluta upp á síðkastið.“

„Fram til þessa hefur umframálinu verið haldið utan markaðar af fjárfestum, og eru þannig u.þ.b. 4,6 m.tonn geymd í vöruhúsum víðsvegar um heiminn þessa dagana. Þessa geymslu álsins þarf hins vegar að fjármagna, og hefur það orðið þyngri róður eftir því sem skuldakreppan í Evrópu hefur sett mark sitt á fjármálamarkaði. Gæti það aukið töluvert við framboð áls á markaði á næstunni. Auk þessa hafa horfur um eftirspurn áls verið að versna undanfarið, líkt og raunin er með margar aðrar hrávörur, eftir því sem efnahagshorfur á heimsvísu hafa versnað. Hefur það haft neikvæð áhrif á álverð frá áliðnu síðasta sumri rétt eins og á hrávöruverð almennt,“ segir ennfremur.

Hvað varðar áhrif hérlendis segja Íslandsbankamenn að þróun álverðs skipti íslenska hagkerfið verulegu máli, enda eru framleidd hér u.þ.b. 830 þús. tonn á ári, sem svarar til nálega 2% af heimsframleiðslu áls. „Á fyrstu átta mánuðum ársins nam útflutningsverðmæti áls tæplega 155 mö.kr., og jókst verðmæti útflutningsins um tæp 6% á milli ára þrátt fyrir ríflega 4% samdrátt í útfluttu magni og 2% sterkari krónu að jafnaði þetta árið en í fyrra. Verðmæti álútflutningsins er nánast hið sama og útflutningsverðmæti sjávarafurða þessa dagana, og er vægi hvorrar greinar fyrir sig u.þ.b. 25% af heildarútflutningstekjum Íslands. Eftir lækkunina undanfarið er álverð nú nálægt meðalverði áranna 2001-2010 á heimsmarkaði og er því vart hægt að fullyrða að verðið sé lágt í sögulegum skilningi í dollurum talið þrátt fyrir óhagfelldar aðstæður á markaði þessa dagana. Hins vegar er á það að líta að verðlag hefur almennt hækkað á þessum tíma. Til að mynda hefur neysluverð í Bandaríkjunum hækkað um u.þ.b. 27% frá síðustu aldamótum, og í ljósi þess er álverð ekki ýkja hátt.“