Forsendur forstjóra Landsnets út úr korti

Í grein í Fréttablaðinu fimmtudaginn 13. október skrifaði Þórður Guðmundsson, forstjóri Landsnets, langa og ítarlega grein þar sem hann gagnrýnir ákvörðun sveitarstjórnar Voga og telur hana vera út úr korti. Ekki veit ég við hvaða kort forstjórinn miðar en þrátt fyrir það langar mig að svara honum í stuttu máli.

Þorsteinn heldur réttilega fram að í skýrslu Almennu verkfræðistofunnar gera skýrsluhöfundar ráð fyrir að landverð sé 500 kr./m. Þetta telur Þorsteinn að sé fjarri lagi, frekar ætti að miða við það landverð sem Landsnet gefur sér. Til að ræða þessa tölur langar mig að benda á að matsnefnd eignarnámsbóta úrskurðaði í október 2009 að Blikastaðaland í Mosfellsbæ skuli metið á 2500 kr./fm. Í október 2009 úrskurðaði matsnefndin að raunhæft verð lands í Kapelluhrauni í Hafnarfirði væri 3.800 kr/m².

Í skýrslunni eru forsendur þær að landverð á þessum stað hækkar talsvert á næstu árum. Þær forsendur dregur Þorsteinn í efa. Ég tel hins vegar að forsendurnar séu mjög raunhæfar. Landið sem um ræðir er fallegt land í alfaraleið, nálægt íbúabyggð og má ætla að landsvæðið verði verðmætt byggingarland innan fárra ára. Nú þegar er farið að þrengja að landfrekri starfsemi á höfuðborgarsvæðinu og því ekki ólíklegt að fyrirtæki fari fljótlega að leita sér að hentugu byggingarlandi í nánd við höfuðborgarsvæðið. Í því samhengi koma ekki mörg sveitarfélög eins vel til greina og Sveitarfélagið Vogar.

Ég fagna því að forstjóri Landsnets svari umfjöllun um málið og mér finnst rétt að hann geri landverð að umtalsefni því það er mikilvægur þáttur í umræðunni. Í því samhengi má ekki líta fram hjá siðferðilegum þætti málsins. Er rétt að þvinga fólk til að selja land sem það hefur ætlað sér að nota í annað eða greiða því bætur sem ekki eru í neinu samhengi við markaðsverð landsins. Í hvaða korti ætli við finnum svarið við því?