Virðingarleysi "fyrir lögum og reglum“

Oddný G. Harðardóttir, þingkona Samfylkingarinnar, segir að íslensk stjórnsýsla hafi verið vanbúin til þess að takast á þá atburði sem skóku landið haustið 2008. Alltof lítil festa hafi einkennt samskipti innan stjórnsýslunnar sem og „virðingarleysi fyrir lögum og reglum". Þetta kemur fram í grein sem Oddný skrifar í tilefni af því að um þrjú ár eru nú liðin frá falli bankanna. Í greininni segir m.a. orðrétt: „Því hefur verið haldið fram að stuttar boðleiðir í litlu landi geti verið kostur, mál gangi hratt fyrir sig og það sé oftast gott en sérstaklega í viðskiptum. Vegna smæðarinnar flýti kunningjatengsl fyrir ferlinu og það sé vel. Við höfum búið við virðingarleysi fyrir lögum og reglum og skilningsleysi á hvað felist í að vera fámenn þjóð. Þetta hefur valdið því að mikið er um óformleg samskipti í stjórnsýslu okkar."

Oddný segir enn fremur að mikill árangur hafi náðst við að koma ríkisfjármálum í betra horf á síðustu þremur árum. Á honum sé hægt að byggja. „Nú þremur árum síðar höfum við náð mjög góðum árangri í ríkisfjármálum og treyst umgjörð fjármálafyrirtækja og stjórnsýslu. Annað og krefjandi verkefni er styttra á veg komin. Það er uppbygging samfélagsins, uppgjör og sáttargjörð. Dómstólar eiga eftir að fjalla um hugsanleg efnahagsbrot . Slíkt tekur vissulega tíma og við verðum að hafa skilning á því. Við þurfum að geta hætt að líta reið um öxl og halda áfram jákvæðri uppbyggingu til framtíðar í anda réttlætis og jöfnuðar. Góð gildi, sanngirni, réttsýni og virðing þurfa að vera okkar leiðarljós þannig að við náum að vinna saman sem þjóð. Og traust þarf að vinna að nýju."

Grein Oddnýjar má nálgast hér.