Frjáls verslun velur Eyjólf Árna mann ársins

Eyjólfur Árni Rafnsson, 54 ára framkvæmdastjóri verkfræðistofunnar Mannvits er maður ársins 2011 í íslensku atvinnulífi, að mati Frjálsrar verslunar.

„Eyjólfur Árni hlýtur þennan heiður fyrir árangur við að virkja íslenskt hugvit, ásamt samstarfsfólki, í þágu atvinnulífsins; nýsköpun; fagmennsku í rekstri; athafnasemi og útsjónarsemi sem gert hefur Mannvit að framúrskarandi fyrirtæki og langstærsta ráðgjafafyrirtæki á sviði verkfræði og tækni á Íslandi," segir í rökstuðningi tímaritsins.

„Hjá Mannviti starfa um 400 reyndir verkfræðingar og tæknimenntað fólk með fjölþætta reynslu á flestum sviðum verkfræðiþjónustu.

Í mestu kreppu Íslandssögunnar hefur Mannvit færst í aukanna og aukið bæði veltu sína og hagnað þrátt fyrir minni framkvæmdir í vegagerð og byggingariðnaði og lítil verkefni á vegum ríkis og sveitarfélaga .

Áætluð velta þessa árs er um 8,4 milljarðar og jókst um 28% frá í fyrra. Hagnaður verður um 900 milljónir króna gangi áætlanir eftir. Fyrirtækið er í 78. sæti á lista Frjálsrar verslunar yfir stærstu fyrirtæki landsins.

Velta ársins 2008 var rúmir 6,6 milljarðar en fór niður í rúman 5,1 milljarð árið 2009; fyrsta árið eftir hrun. En Mannvit kom til baka á árinu 2010 og varð veltan þá tæpur 6,1 milljarður og áætluð velta þessa árs er 8,4 milljarðar.

Starfsemi Mannvits er fyrst og fremst á Íslandi og koma mestar tekjur af þjónustu við álverin og orkufyrirtækin.

Mannvit er með starfsemi í Bretlandi og Mið- og Austur-Evrópu. Unnið er að því að koma upp starfsemi á vegum Mannvits í Chile með áherslu á jarðvarmaverkefni.

Að sögn Eyjólfs hafa 80% starfsmanna Mannvits lokið háskólanámi. Um 3% starfsmanna eru með doktorspróf og 38% hafa lokið mastersprófi.

Mannvit var stofnað árið 2008 við sameingu Hönnunar, VGK og Rafhönnunar. Fyrirtækin standa á gömlum merg en VGK og Hönnun hafa veitt verkfræðiráðgjöf allt frá árinu 1963 og Rafhönnun frá árinu 1969.

Eyjólfur Árni Rafnsson er með doktorspróf í byggingarverkfræði frá University of Missouri-Rolla í Bandaríkjunum.

Maki hans er Egilína S. Guðgeirsdóttir. Þau eiga fjóra syni og fimm barnabörn."