Perez: Einn besti dagur lífs míns

Sergio Perez frá Mexíkó spretti úr spori á Sauber Formúlu 1 bíl á laugardaginn í heimabæ sínum Guadalajara. Perez er nýliði í Formúlu 1 og er talið að milli 150.000-200.000 manns hafi fylgst með kappanum í heimabænum.

"Þetta er einn besti dagur lífs míns", sagði Perez í fréttatilkynningu frá Sauber, "Þetta var frábær upplifun. Ég hef aldrei upplifað nokkuð þessu líkt og með svona mikinn fjölda að hvetja mig. Ég er stoltur af því að vera frá Mexikó og að fá allan þennan stuðning. Þetta er mikil hvatning fyrir komandi tímabil."

Perez er 21 árs gamall og ók margsinnsins fram og tilbaka á 1.5 km löngu afmörkuðu svæði á götum Guadalajara, sem hafði verið lokað vegna viðburðarins. Perez er fyrsti Formúlu 1 ökumaðurinn frá Mexíkó, sem mætir til leiks í meira en 30 ár.

Liðsfélagi Perez hjá Sauber í formi ökumanns er Japaninn Kamui Kobayashi, en Peter Sauber eigandi liðsins hefur verið naskur að uppgötva og þroska unga ökumenn gegnum tíðina.