Nær óbreyttur hagnaður hjá Íslandspósti milli ára

Hagnaður varð af rekstri Íslandspósts hf. á árinu 2010 að fjárhæð 93 milljónir króna. Þetta er nær sami hagnaður og varð hjá póstinum árið áður.

Í tilkynningu um uppgjörið segir að heildartekjur félagsins á síðasta ári námu 6,3 milljörðum króna og drógust saman um 1% frá fyrra ári.  Heildareignir voru 5,0 milljarðar króna í árslok 2010 og eigið fé nam 2,7 milljörðum króna.  Félagið greiddi 40 milljónir króna í arð til ríkissjóðs á árinu.

Verulegur samdráttur hefur verið í bréfasendingum á undanförnum árum.  Frá hausti 2008 til ársloka 2010 hefur bréfum í einkarétti fækkað um 20%.  Spáð er áframhaldandi magnminnkun og má gera ráð fyrir að bréfapósti muni fækka enn frekar um allt að 25% til ársins 2015.

Á árinu 2010 var áfram unnið að endurbótum á starfsstöðvum Íslandspósts í samræmi við ákvörðun stjórnar frá árinu 2006 um uppbyggingu starfsstöðva félagsins á helstu þéttbýlisstöðum landsins.  Sú ákvörðun kom til af því, að við uppskiptingu Pósts og síma árið 1998 í tvö aðskilin félög, Íslandspóst annars vegar og Símann hins vegar, tók Íslandspóstur yfir meginhluta fasteigna Pósts og síma, en þær voru á sínum tíma byggðar með þarfir hins sameiginlega fyrirtækis í huga.

Í flestum tilvikum hentuðu þær ekki þeirri starfsemi, sem Íslandspósti var ætlað að sinna.  Því hefur markvisst verið unnið að endurbótum á starfsaðstöðu félagsins víðs vegar um land undanfarin ár, einkum í þéttbýlissveitarfélögum.  Uppbyggingaráætlunin er nú vel á veg komin og voru á árinu 2010 nýjar eða endurbættar starfsstöðvar teknar í notkun á Akureyri, í Kópavogi og í Reykjavík.

Hvern virkan dag handleika starfsmenn Íslandspósts um 350 þúsund póstsendingar til íslenskra heimila og fyrirtækja.