Orkuveitan selur eignir fyrir 465 milljónir

Orkuveita Reykjavíkur hefur selt þrjár eignir fyrir samtals 465 milljónir króna. Eignirnar voru auglýstar til sölu í vor og í sumar en þær eru samliggjandi jarðir Hvammur og Hvammsvík í Kjós, Hótel Hengill á Nesjavöllum og húsnæði í Elliðaárdal, sem hýsti minnjasafn Orkuveitunnar.

Í tilkynningu segir að verðið sem fékkst fyrir eignirnar séu heldur meiri en væntingar stóðu til en þær voru byggðar á mati sérfræðinga á fasteignamarkaði. Sala eignanna er liður í aðgerðaráætlun vegna fjárhagsvanda fyrirtækisins.

Enn er opið fyrir tilboð í Perluna í Öskjuhlíð en tilboðsfrestur í hana rennur út 17. október.