Mál vegna skuldabréfs Björgólfs Guðmundssonar fellt niður

Sérstakur saksóknari hefur fellt niður rannsókn á peningamarkaðssjóðum Landsbankans vegna kaupa á skuldabréfi Björgólfs Guðmundssonar.

Stefán Héðinn Stefánsson, var framkvæmdastjóri eignastýringasviðs Landsbankans og stjórnarformaður Landsvaka, en hann var handtekinn og yfirheyrður í janúar síðastliðnum vegna rannsóknar sérstaks saksóknara meðal annars á kaupum Landsbankans á verðbréfum af sjóðum Landsvaka hinn 6. október 2008, eftir lokun sjóðanna. Það mál er enn í rannsókn vegna gruns um skilasvik.

Stefán Héðinn var líka grunaður um brot vegna þess að Landsvaki keypti skuldabréf útgefið af Björgólfi Guðmundssyni sjálfum, en grunsemdir voru um að með þessu hefði Landsvaki fyrir út fyrir heimildir sjóðsins til fjárfestinga.

Árið 2005 keypti Landsvaki skuldabréf upp á 400 milljónir króna sem útgefið var af Björgólfi Guðmundssyni. Greitt var af bréfinu framan af, en eftirstöðvar þess voru 190 milljónir króna við fall bankanna. Björgólfur var þá formaður bankaráðs Landsbankans og einn aðaleigenda hans.

Samkvæmt upplýsingum fréttastofunnar leiddi rannsókn á þessu máli í ljós að stjórnendur sjóðsins höfðu ekki ásetning um að fara út fyrir fjárfestingarstefnuna heldur hafi, á tímapunkti kaupanna, bréf með persónulegri ábyrgð Björgólfs talin traust fjárfesting. Einnig voru ákvæði í samþykktum Landsvaka ekki þess eðlis að hægt væri að slá því föstu að kaup á skuldabréfi einstaklings teldist brot á samþykktum, sérstaklega ef um væri að ræða traust bréf.

Rannsókn sérstaks saksóknara í máli Stefáns og Landsvaka í tilviki skuldabréfs Björgólfs Guðmundssonar hefur nú verið felld niður. Samkvæmt upplýsingum fréttastofunnar fékk verjandi Stefáns Héðins bréf þess efnis í síðustu viku. Stefán Héðinn og kaup Landsbankans á verðbréfum af sjóðum Landsvaka hinn 6. október 2008, eftir lokun sjóðanna,  er enn í rannsókn vegna gruns um skilasvik.

Ólafur Þór Hauksson, sérstakur saksóknari sagði við fréttastofu í dag að rannsókn á kaupunum á skuldabréfinu hafi leitt til þess að ekki hafi verið tilefni til að höfða mál með útgáfu ákæru. Rannsókn á því máli telst því lokið.

Málefni Landsvaka hefur nú þegar komið til kasta dómstólanna, en aðeins í einkaréttarlegu tilliti. Í nóvember í fyrra vísaði Hæstiréttur frá skaðabótamálum, sem hópur einstaklinga og fyrirtækja höfðaði gegn Landsbankanum og Landsvaka, vegna rýrnunar á peningamarkaðssjóðunum. Héraðsdómur Reykjavíkur hafði áður dæmt að Landsvaki og Landsbankinn væru skaðabótaskyldir. thorbjorn@stod2.is