Fisk Seafood eignast Farsæl hf. að fullu

Gengið hefur verið frá sölu á 66% hlut í útgerðarfélaginu Farsæli hf. á Grundarfirði til Fisk Seafood, sem eftir þessi viðskipti hefur eignast allt hlutafé í félaginu.

Fjallað er um málið á vefsíðu Grundarfjarðar. Þar segir að Farsæll hf. hafi rekið útgerð í Grundarfriði frá því 1936 eða í 75 ár en vegna lítilla aflaheimilda hafa rekstrarskilyrði verið erfið síðustu ár og sýnilegt að þörf var á breytingum til þess að efla starfsemi félagsins.

Fisk Seafood ráðgerir að færa varanlegar aflaheimildir á Farsæl fyrir komandi fiskveiðiár og efla þar með útgerðina á staðnum. Fisk Seafood hefur rekið fiskvinnslu í Grundarfirði frá 1992 og eftir þessi viðskipti munu rúm 20% af heildarveltu Fisk Seafood fara fram í Grundarfirði.