Bifreið Matthíasar fannst brunnin

Bifreið Matthíasar Þórarinssonar, sem leitað hefur verið að undanfarna daga, fannst í gær í malarnámum nærri heimili hans.

Bifreiðin var brunnin, en lögreglan telur að hún hafi brunnið fyrir nokkru síðan. Fáar vísbendingar hafa borist lögreglu um ferðir Matthíasar.

Talið er hugsanlegt að Matthías hafi verið á ferðinni á Selfossi viku fyrir jól. Þá var hann staddur á Austurvegi á móts við mjólkurbú Flóamanna á leið til austurs.

Lögreglan segir að Matthías skeri sig nokkuð úr hvað klæðaburð varðar. Hann sé stundum í fötum sem hann saumar sjálfur. Þegar sást til hans var hann klæddur í græna úlpu og gallabuxur. Hann var með svart „buff" á höfðinu.