Spáir 0,5 prósentustiga vaxtalækkun í febrúar

Greining Íslandsbanka reiknar með því að Peningastefnunefnd Seðlabankans ákveði að lækka vexti bankans um 0,5 prósentur á næsta vaxtaákvörðunarfundi sínum sem er 2. febrúar næstkomandi.

Lækka vextir á viðskiptareikningum innlánsstofnana og hámarksvextir innistæðubréfa við þetta í 3,0% og 3,75% hvor um sig, vextir á lánum gegn veði til sjö daga í 4,0% og daglánavextir í 5,0%.

Fjallað er um málið í Morgunkorni greiningarinnar. Þar segir að síðasta vaxtaákvörðun Peningastefnunefndarinnar var 8. desember síðastliðinn og lækkaði nefndin þá vexti á viðskiptareikningum innlánsstofnanna um 0,5 prósentur og vexti á viðskiptareikningum innlánsstofnana og hámarksvexti innistæðubréfa um eina prósentu. Þá lækkaði bankinn daglánavexti um 1,5 prósentur.

Aðgerðin var hvorutveggja til að draga úr peningalegu aðhaldi og til að þrengja vaxtaganginn. Í yfirlýsingu nefndarinnar vegna ákvörðunarinnar segir að hún telur að eitthvert svigrúm sé enn til staðar til frekari slökunar peningalegs aðhalds haldist gengi krónunnar stöðugt eða styrkist og hjaðni verðbólgan eins og spáð er. Hún gerir þó þann fyrirvara að óvissa sé um hversu svigrúmið er mikið til skemmri tíma vegna áforma um afnám hafta á fjármagnshreyfingar.

Gengi krónunnar hefur lækkað aðeins frá vaxtaákvörðuninni í desember. Hefur gengisvísitalan á þessum tíma farið úr 205,3 í 209,3 sem samsvarar ríflega 1,9% veikingu. Gengi krónunnar hefur hins vegar haldist nokkuð stöðugt gagnvart evrunni en hún hefur kostað um 151 krónu frá síðustu vaxtaákvörðun.

Millibankamarkaðurinn með gjaldeyri hér á landi ákvarðar krossinn á milli evru og krónu. Hreyfingin í gengisvísitölunni er hins vegar til komin vegna hreyfingar í gengi evru gagnvart dollaranum en evran hefur verið að lækka nokkuð á alþjóðamörkuðum vegna erfiðleika í fjármálum einstakra ríkja innan evrusvæðisins. Kaup Seðlabankans á gjaldeyri hafa haft lítil áhrif á gengi krónunnar þó að þau hafi verið talsverð. Kaup þessi, ásamt því að nú er fjórða endurskoðun efnahagsáætlunar Aljóðagjaldeyrissjóðsins og íslenskra stjórnvalda í höfn, hefur styrkt gjaldeyrisforðann, dregið úr endurfjármögnunaráhættu ríkissjóðs og þannig rennt stoðum undir gengi krónunnar. Þessu til viðbótar styðja gjaldeyrishöftin, afgangur af vöru- og þjónustuviðskiptum við útlönd og munur innlendra og erlendra vaxta við krónuna.

Frá síðustu vaxtaákvörðun hefur verðbólgan farið úr 2,6% í 2,5%. Verðbólgumarkmið Seðlabankans er þar með í höfn en hækkun vísitölu neysluverðs á milli nóvember og desember var í lægri kanti þess sem spáð var. Verðbólgan á fjórða fjórðungi síðasta árs var nokkru minni en Seðlabankinn spáði. Reiknum við auk þess með því að verðbólgan verði í námunda við 2,5% markmið Seðlabankans á þessu ári.