Vísitala framleiðsluverðs lækkaði í september

Vísitala framleiðsluverðs í september 2011 var 215,3 stig og lækkaði um 0,6% frá ágúst 2011. Vísitala framleiðsluverðs fyrir sjávarafurðir var 255,8 stig, sem er hækkun um 0,2% frá fyrri mánuði og vísitala fyrir stóriðju var 250,8 stig, lækkaði um 2,6%.

Þetta kemur fram á vefsíðu Hagstofunnar. Þar segir að vísitalan fyrir matvæli hækkaði um 1,2% og vísitala fyrir annan iðnað hækkaði um 1,1%.

Vísitala framleiðsluverðs fyrir vörur sem framleiddar voru og seldar innanlands hækkaði um 1,2% milli mánaða en vísitala fyrir útfluttar afurðir lækkaði um 1,2%.

Miðað við september 2010 hefur vísitala framleiðsluverðs hækkað um 13,9% en verðvísitala sjávarafurða um 15,3%. Á sama tíma hefur verð á afurðum stóriðju hækkað um 13,2% en matvælaverð hefur hækkað um 10,1%.