Vodafone annast alla símaþjónustu fyrir Akureyrarbæ

Vodafone mun annast alla símaþjónustu fyrir Akureyrarbæ næstu þrjú árin, samkvæmt samningi sem undirritaður var fyrir norðan í vikunni.  Samningurinn var gerður að undangengnu útboði sem tvö símafyrirtæki tóku þátt í.

Í tilkynningu segir að tilboð Vodafone var hagstæðara og í framhaldinu var gengið til samninga um fastlínu- og farsímaþjónustu til næstu þriggja ára.

Á sama tíma var undirritaður samningur um símaþjónustu við Norðurorku, eina af 19 stofnunum Akureyrarbæjar sem geta gengið inn í samninginn og tryggt sér þjónustu Vodafone á sömu kjörum og sveitarfélagið sjálft.

Með samningnum hefur Vodafone enn styrkt stöðu sína enn frekar í þjónustu við sveitarfélögin því nú eru sjö stærstu sveitarfélög landsins í viðskiptum við Vodafone; Reykjavík, Kópavogur, Hafnarfjörður, Akureyri, Reykjanesbær, Garðabær og Mosfellsbær  auk Seltjarnarness, Norðurþings o.fl.

„Samningurinn við Akureyrarbæ er mikill áfangi fyrir Vodafone því hér er eitt stærsta og öflugasta bæjarfélag landsins komið í umfangsmikil viðskipti við okkur. Við höfum mikla reynslu af þjónustu við stærstu sveitarfélög og fyrirtæki landsins og hlökkum til þess að vinna með Akureyrarbæ næstu árin,“ segir Ómar Svavarsson, forstjóri Vodafone í tilkynningunni.

„Við erum mjög ánægð með samninginn, enda tryggir hann í senn örugg fjarskipti og umtalsverða lækkun á fjarskiptakostnaði bæjarins. Útboðsferlið var opið og gagnsætt og í anda góðrar stjórnsýslu, þar sem strangar gæðakröfur eru gerðar af okkar hálfu og svo leitað tilboða. Niðurstaðan tryggir hagræðingu í rekstri bæjarins, sem er mikilvægt í árferði eins og nú er,“ segir Eiríkur Björn Björgvinsson, bæjarstjóri Akureyrar.