Síminn annast öll fjarskipti Icelandair Group og dótturfélaga

Síminn og Icelandair Group hafa undirritað samning þess efnis að Síminn sjái um öll fjarskipti Icelandair Group, Icelandair og dótturfélaga. Samningurinn er gerður til þriggja ára. Í samningnum felst að Síminn veiti félögunum farsíma- og talsímaþjónustu en auk þess þjónustu í gagnatengingum.

Gengið var til samninga við Símann á grundvelli þjónustu og framtíðasýnar þar sem Síminn kemur á móts við þarfir Icelandair Group hf. og dótturfélaga.

Sævar Freyr Þráinsson, forstjóri Símans: "Samningurinn við Icelandair Group hf. er mikill áfangi fyrir Símann því hér er eitt stærsta og öflugasta fyrirtæki landsins komið í umfangsmikil viðskipti við okkur. Samningurinn er enn ein staðfesting á því að traust íslensk fyrirtæki, sem mynda hornstein íslenskrar atvinnustarfssemi, setja öryggi, reynslu og þekkingu í fyrsta sæti þegar fjarskiptaþjónusta er valin."

Icelandair Group samanstendur af níu dótturfélögum og leggur áherslu á alþjóðlega flugstarfssemi og ferðamál.  Stærsta dótturfélag Icelandair Group er Icelandair, sem einbeitir sér að þeim tækifærum sem felast í hentugri staðsetningu Íslands á heimskortinu og hefur byggt upp alþjóðalegt leiðakerfi með Ísland sem miðpunkt.