Gjörbreytti fjölmiðlalandslaginu

Stöð 2 og Ölgerðin hafa átt frábært samstarf í þau 25 ár sem liðin eru frá opnun Stöðvar 2. Ölgerðin er með stærstu auglýsendum landsins í sjónvarpi og það er gríðarlega mikilvægt fyrir fyrirtækið að hafa góðan aðgang að stórum hluta þjóðarinnar í gegnum metnaðarfulla dagskrá Stöðvarinnar. Stöð 2 hefur sannað sig sem mjög öflugur auglýsingamiðill.

Ég man að ég og félagar mínir freistuðum þess að fá að sjá um grínþátt þegar Stöðin fór í loftið. Við áttum nokkra góða fundi með Jónasi R. dagskrárstjóra en því miður fyrir okkur runnu þessi áform út í sandinn.

Stöð 2 hefur gjörbreytt fjölmiðlalandslaginu. Með tilkomu stöðvarinnar jókst samkeppni til muna á auglýsingamarkaði og það hefur komið auglýsendum til góða. Stöð 2 væri aldrei í þeirri stöðu sem hún er núna nema vegna þess að áhorfendur á Íslandi kunna að meta dagskrá stöðvarinnar. Ég óska afmælisbarninu alls hins besta.