Viðskiptajöfnuður óhagstæður um 48 milljarða

Viðskiptajöfnuður mældist óhagstæður um 48,3 milljarða kr. á fyrsta ársfjórðungi samanborið við 58,4 milljarða kr. óhagstæðan jöfnuð fjórðunginn á undan. Afgangur af vöruskiptum við útlönd var 24,5 milljarðar kr. og 2,2 milljarða kr. halli var á þjónustuviðskiptum. Jöfnuður þáttatekna var hinsvegar neikvæður um 70,5 milljarða kr.

Þetta kemur fram á vefsíðu Seðlabankans. Þar segir að halla á þáttatekjum á fyrsta ársfjórðungi má eins og áður rekja til innlánsstofnana í slitameðferð. Reiknuð gjöld vegna þeirra námu 44,1 milljarða kr. og tekjur 5,5 mjörðum kr. Jöfnuður þáttatekna án áhrifa innlánsstofnana í slitameðferð var óhagstæður um 31,9 milljarða kr. og viðskiptajöfnuður 9,6 milljarða kr.

Erlendar eignir þjóðarbúsins námu 4.202 milljörðum kr. í lok ársfjórðungsins en skuldir 14.272 milljörðum kr. Hrein staða við útlönd var því neikvæð um 10.070 milljarða kr. og hækka nettóskuldir um 290 milljarða kr. á milli ársfjórðunga. Að frátöldum innlánsstofnunum í slitameðferð námu eignir þjóðarbúsins 2.515 milljarða kr. og skuldir 3.327 milljörðum kr. og var hrein staða þá neikvæð um 812 milljarða kr.

Gerð hefur verið breyting á framsetningu á stöðu þjóðarbúsins án innlánsstofnanna í slitameðferð með því að telja beina erlendra fjármunaeign með eignum þeirra. Það hefur ekki verið mögulegt fyrr m.a. vegna skorts á nákvæmum upplýsingum og flókins utanumhalds um erlendar fjárfestingar. Vegna þessa teljast eignir þeirra hærri en áður hefur verð sett fram hér. Það hefur þau áhrif að erlend staða þjóðarbúsins án innlánsstofnanna í slitameðferð telst verri sem nemur beinni fjármunaeign þeirra.

Flest fyrirtæki í beinni fjárfestingu hafa lokið við uppgjör ársins 2010 og hafa tölur ársins verið endurskoðaðar miðað við nýjustu upplýsingar frá þeim. Hækkun á fjármunaeign innlendra aðila erlendis og erlendra aðila innanlands á 4. ársfjórðungi 2010 má að stórum hluta rekja til endurskipulagningar skulda. Það sem áður tilheyrði lánaskuld í beinni fjárfestingu innlendra aðila erlendis flyst yfir í fjárfestingu erlendra aðila innanlands. Endurskipulagningin hefur ekki áhrif á hreina erlenda stöðu. Einnig var hlutafjáreign innlendra aðila erlendis á árinu 2010 hærri en áður var áætlað og nær sú endurskoðun aftur til fyrsta ársfjórðungs 2010.