Horn skráð á markað á næstu vikum

Guðrún Ragnarsdóttir og Steinþór Pálsson, bankastjóri Landsbankans, hafa sagt sig úr stjórn Horns fjárfestingafélags, dótturfélags Landsbankans. Greint er frá þessu á vefsíðu Horns. Guðrún óskaði eftir því að hætta í stjórninni þar sem hún hefur tekið sæti í nýrri stjórn Bankasýslu ríkisins. Steinþór hættir hins vegar „með það fyrir augum að draga úr beinum tengslum Landsbankans og Horns" eins og orðrétt segir á vefsíðu Horns.

Nýr stjórnarformaður Horns er Sigurbjörn Jón Gunnarsson, en aðrir í stjórninni eru Ragnhildur Geirsdóttir, Guðrún Björg Birgisdóttir, Hilmar Ágústsson og Fran Páll Sigurðsson, framkvæmdastjóri fjármála hjá Landsbankanum, en hann er nú eini fulltrúi bankans í stjórn Horns.

Fyrirhuguð er skráning Horns á markaðs á næstu vikum, að því er fram kemur á vefsíðu Horns. Hluti af undirbúningi að skráningu félagsins hefur verið færsla á eignum frá Horni til Landsbankans. Meðal þeirra eigna sem seldar hafa verið til Landsbankans að undanförnu er 29,6% hlutur í fasteignafélaginu Reitum hf. og 13,75% hlutur í Eyri Invest. Báðar þessar eignir voru seldar á til Landsbankans miðað við bókfært virði 30. september sl., að því er segir á vefsíðu Horns. Þá hefur Landsbankinn einnig keypt 3,8% hlut í Össuri.