Dalurinn hefur rokið upp um 10 krónur

Bandaríkjadalur hefur hækkað um tíu krónur á tæplega tveggja mánaða tímabili, eða frá því í byrjun nóvember. Þetta þykir nokkuð skörp hækkun. Jón Bjarki Bentsson, hjá Greiningu Íslandsbanka, segir að skýringin liggi fyrst og fremst í tveimur þáttum. Annars vegar til þess að dalurinn hafi verið að styrkja sig töluvert alþjóðlega, einkum vegna óvissu í tengslum við skuldakreppuna í Evrópu. „Þá hefur krónan jafnframt verið að veikjast og er talið að þar sé um árstíðabundna lækkun að ræða," segir Jón Bjarki.

Jón Bjarki segir að þessa árstíðabundnu sveiflu í gengi krónunnar megi rekja til tveggja þátta. Annars vegar hafi flæði ferðamannagjaldeyris inn í landið minnkað verulega frá því í sumar. „Svo er útflæði gjaldeyris í nóvember og framan af í desember sem tengist jólaverslun," segir Jón Bjarki. Þessi tími ársins, þegar þessir tveir þættir verki saman, sé kannski sá tími þar sem krónan er veikust fyrir. Jón Bjarki á von á að gengi krónunnar muni hækka á vormánuðum á næsta ári.