Fyrrum stjórnendur VBS grunaðir um umboðssvik

Fyrrum stjórnendur VBS fjárfestingarbanka eru til rannsóknar hjá sérstökum saksóknara vegna gruns um umboðssvik en málið snýst um færslu á láni VBS yfir í ógjaldfært félag í eigu stærstu eigenda bankans. Fyrrverandi forstjóri segir engan hafa rætt við sig um málið. Hann vísar lögbrotum á bug segist hafa tekið allar ákvarðanir með hagsmuni bankans í huga.

Nokkrum vikum eftir bankahrunið haustið 2008 voru nokkrar fasteignar færðar úr fasteignafélaginu Ice Properties sem var í eigu Sunds (nú Ice Capital) yfir í félagið Fasteignafélagið Okkar sem er í eigu Páls Magnússonar.

Sund var stærsti hluthafinn í VBS og Páll var stjórnarformaður VBS á þessum tíma og auk þess framkvæmdastjóri Sunds og sat því beggja vegna borðsins í þessum gerningi, að því er fram kemur í Viðskiptablaðinu í dag. Ice Properties skuldaði VBS sex til sjö hundruð milljónir króna með veði í eignum félagsins. Í desember 2008 var lán VBS til Ice Properties fært inn í Sund, en Sund tapaði 39,3 milljörðum króna á árunum 2008 og 2009 og var á þessum tíma ógjaldfært félag, að því er fram kemur í Viðskiptablaðinu.

Til einföldunar má segja að með þessu hafi fasteignirnar sem tryggja áttu lánin færðar inn í eitt félag meðan skuldirnar voru færðar í annað félag sem gat ekki staðið við skuldbindingar sínar. Slitastjórn VBS hefur þegar tilkynnt að hún hyggist reyna að rifta þessum gerningi, að því er fram kemur í Viðskiptablaðinu.

Þessi viðskipti eru nú til rannsóknar hjá sérstökum saksóknara vegna gruns um umboðssvik og Jón Þórisson, fyrrverandi forstjóri VBS og Páll Magnússon, fyrrum stjórnarformaður bankans, eru grunaðir um að bera á byrgð á hinum meintu brotum.

Ólafur Þór Hauksson, sérstakur saksóknari, staðfesti í samtali við fréttastofu að málið væri til rannsóknar hjá embættinu. Hann sagði rannsóknina skammt á veg komna og gat ekki veitt frekari upplýsingar að svo stöddu

„Ég hef ekkert heyrt af þessu máli og ef ekki verið boðaður í skýrslutöku. Ég man nú ekki nákvæmlega málavexti, og tel réttast að ræða það við saksóknarann ef hann hefur áhuga á að ræða það við mig," segir Jón Þórisson, fyrrverandi forstjóri VBS.

„Ég held að menn hljóti að þurfa að vera með allar staðreyndir á borðinu áður en þeir komast að niðurstöðu. Í grófum dráttum er það þannig, að þarna er slitastjórnin að vinna eftir bestu samvisku og bara eðlilegur hlutur að þeir vísi málinu þangað sem þeir telja að það eigi heima. Ég hef svo sem engar athugasemdir við það, en þarna var ekkert misjafnt á ferðinni. Ef ég man þetta tiltekna atriði rétt þá styrktu þessi viðskipti stöðu bankans mikið. Við vorum í betri stöðu eftir þessi viðskipti en við vorum í áður. Þessar ákvarðanir voru teknar byggðar á gögnum sem lágu fyrir á þeim tíma. Þetta var skynsamleg ráðstöfun fyrir VBS," segir Jón. Hann segir að ef menn hafi verið að rýra hagsmuni bankans hefðu athugasemdir um það komið fram hjá innri endurskoðun bankans. thorbjorn@stod2.is