Afstaða Svía ræður miklu um framhaldið

Afstaða sænsku ríkisstjórnarinnar, og eftir atvikum sænska þingsins, til málefna Íslands ræður miklu um framvindu efnahagsáætlunar stjórnvalda og Alþjóðagjaldeyrissjóðsins.

Ríkisstjórnin leggur ríka áherslu á að áætlunin gangi eftir enda leiðarljós hennar út úr efnahagsþrengingunum. Segir í yfirlýsingu stjórnarinnar frá í gær að hún muni „freista þess að tryggja hnökralausa framvindu áætlunarinnar.“ Í því skyni verður rætt við forystumenn AGS, samstarfsþjóðirnar og hin Norðurlöndin og Pólland, sem hafa lánað Íslendingum peninga.

Samkvæmt heimildum Fréttablaðsins hófu embættismenn þegar í síðustu viku að setja sig í samband við erlenda starfsbræður til að undirbyggja frekari viðræður í kjölfar niðurstöðu þjóðaratkvæðagreiðslunnar. Næstu daga verður allur þungi starfsmanna utanríkisþjónustunnar á málinu; þeir munu einbeita sér að því að kynna sjónarmið íslenskra stjórnvalda og koma í veg í fyrir að niðurstaðan hafi áhrif á samskipti landsins við önnur ríki, alþjóðastofnanir og fjármálastofnanir.

Samkvæmt heimildum blaðsins hafa sænsk stjórnvöld verið varfærin í að lýsa afstöðu sinni en ríkisstjórnir hinna Norðurlandanna sýnt málinu skilning. Er róið að því öllum árum að fá Svía til fylgilags enda litið svo á að fallist þeir á að tekið sé tillit til breyttra aðstæðna fylgi aðrar þjóðir í kjölfarið.

Á sínum tíma stóðu Svíar harðir á því að Íslendingar gengju frá Icesave-samningum áður en lán Norðurlandanna yrðu veitt og efnahagsáætlun stjórnvalda og AGS hleypt af stokkunum.björn@frettabladid.is