NBA: Meistaralið Lakers tapaði fimmta leiknum í röð

Níu leikir fóru fram í NBA deildinni í körfubolta í gær en deildarkeppninni fer senn að ljúka og verða síðustu leikirnir á miðvikudag. Úslitakeppnin er handan við hornið og liðin sem þangað eru komin keppast nú við að sýna andlegan styrk sinn á lokasprettinum. Chicago lagði Orlando á útivelli i gær 102-99, Miami átti ekki í vandræðum með Boston á heimavelli 100-77, og það vekur kannski mesta athygli að Oklahoma rúllaði meistaraliði Lakers upp á útivelli 120-106 – en þetta er fimmti tapleikur Lakers í röð.

Eins og staðan er þessa stundina mætast eftirfarandi lið í úrslitakeppninni:

Austurdeild:

Chicago (1) – Indiana (8)

Miami (2) – Philadelphia (7)

Boston (3) – New York (6)

Orlando (4) – Atlanta (5)

Vesturdeild:

San Antonio (1) – Memphis (8)

LA Lakers (2) – New Orleans (7)

Dallas (3) – Portland (6)

Oklahoma (4) – Denver (5)

LA Lakers – Oklahoma 106-120

Oklahoma reyndist Lakers liðinu erfitt í úrslitakeppninni á síðustu leiktíð og það er ljóst að meistaraliðið frá Los Angeles er í tölvuerðum vandræðum þessa stundina. Liðið tapaði 120-106 á heimavelli og er þetta fimmti tapleikur liðsins í röð. Það er lengsta taphrina Lakers frá tímabilinu 2006-2007. Liðið hefur unnið 55 leiki í vetur og tapað 25 og næsti leikur er gegn San Antonio á heimavelli en San Antonio er í efsta sæti Vesturdeildar. Lakers og Dallas eru nú jöfn í í 2.-3. sæti og Oklahoma er ekki langt undan í fjórða sæti með 54 sigurleiki og 26 tapleiki. Það getur því margt breyst í síðustu tveimur umferðunum en Lakers er reyndar með betri árangur í innbyrðisviðureignum gegn þessum liðum í vetur.

Þetta er fjórði sigurleikur Oklahoma í röð og Kevin Durant skoraði 31 stig fyrir liðið en hann er stigahæsti leikmaður deildarinnar. Russell Westbrook skoraði 26 fyrir Oklahoma sem hafði ekki unnið í Staples Center í síðustu átta leikjum. Lakers var yfir 104-103 þegar aðeins 3 mínútur voru eftir af leiknum. Kobe Bryant skoraði alls 31 stig fyrir Lakers og Pau Gasol skoraði 26. Andrew Bynum skoraði 12 og tók 13 fráköst.

Orlando – Chicago 99-102

Derrick Rose fór að venju á kostum í liði Chicago en hann skoraði alls 39 stig og kom í veg fyrir að Jameer Nelson gæti skotið auðveldlega á körfuna úr síðasta skot leiksins. Þetta var 60. sigurleikur Chicago í vetur en Orlando lék án miðherjans Dwight Howard sem tók út leikbann eftir að hafa fengið 18 tæknivillur í vetur. Chicago hefur unnið 49 af síðustu 60 leikjum sínum og þetta er aðeins í sjötta sinn sem félagið nær þeim áfanga að vinna 60 leiki á einni leiktíð. Í fimm skipti sem Bulls hefur náð 60 sigurleikjum hefur félagið fagnað NBA meistaratitlinum. Chicago er í hörkubráttu gegn San Antonio Spurs um besta árangur allra liða í deildinni og þar með heimaleikjarétt í gegnum alla úrslitakeppnina.

Heitt í kolunum í Miami enda úrslitakeppnin að nálgast

Miami – Boston 100 -77

LeBron James skoraði 27 stig fyrir heimamenn í Miami og þeir Dwyane Wade og Chris Bosh skoruðu 13 stig hvor í frekar stórum sigri Miami gegn Boston Celtics. Þetta er í fyrsta sinn sem Miami nær að leggja Bostin í vetur en liðin hafa mæst alls fjórum sinnum. Miami náði öðru sætinu í Austurdeildinni en Boston er í því þriðja. Paul Pierce var stigahæstur í liði Boston með 24 og Kevin Garnett skorðaði.

Charlotte – Detroit 101-112

Rodney Stuckey skoraði 24 stig fyrir Detroit og gaf að auki 11 stoðsendingar. Þetta var þriðji sigur liðsins í röð en svo gæti farið að liðið skipti um eigendur á allra næstu dögum en félagið hefur verið í lausu lofti hvað það varðar í allan vetur. Charlotte, sem er í eigu Michael Jordan, tapaði sjötta leiknum í röð og liðið kemst ekki í úrslitakeppnina en þeim árangri náði liðið í fyrsta sinn í fyrra. Gerald Henderson var stigahæstur með 21 stig í liði Charlotte.

Indiana – New York 109-110

Carmelo Anthony skoraði sigurkörfuna fyrir New York 4,9 sek. fyrir leikslok og hann varði síðan skottilraun frá Danny Granger þegar hann reyndi að tryggja heimamönnum sigur á síðustu sekúndunni. New York skoraði sjö síðustu stig leiksins eftir aðhafa verið undir 109-103, en Indiana hitti ekki úr sex síðustu skotum sínum í leiknum. Anthony skoraði alls 34 stig fyrir New York sem er þessa stundina í sjötta sæti Austurdeildar en Philadelphia er í sætinu þar fyrir neðan með einum sigurleik færra.

Dallas – Phoenix 115-90

Dirk Nowitzki skoraði 19 stig fyrir Dallas og Shawn Marion bætti við 18 og tók að auki 11 fráköst. Dallas vann alla fjóra leikina hjá þessum liðum í vetur en það hefur ekki gerst frá tímabilinu 1986-1987.



Golden State – Sacramento Kings 103-104

Toronto – New Jersey 99-92

Memphis – New Orleans 111-89