Ójafnvægi einkennir hlutabréfamarkaði

Hlutabréfamarkaðir halda áfram að sveiflast upp og niður eftir því hver tíðindin eru hverju sinni af þreifingum leiðtoga evrulandanna við að taka á skuldavandanum á svæðinu.

Þannig hækkuðu hlutabréfamarkaðir víðsvegar í Evrópu í morgun, um 0 til 1%, vegna frétta um að aðgerðaáætlun um hvernig taka skyldi á vanda Ítalíu væri þegar komin af stað og að Seðlabanki Evrópu hefði ákveðið að lána landinu fé svo það geti staðið við skuldbindingar sínar.  En markaðirnir hafa síðan lækkað um svipað hlutfall eftir því sem liðið hefur á daginn, ástæðan er áframhaldandi óvissa og slakar hagtölur.

Mikið ójafnvægi ríkir því á mörkuðum, sem oft er vísbending um að fjárfestar séu órólegir og láti ekki stjórnast af raunverulegum áhuga á rekstrartölum þeirra félaga sem eru skráð á markað. Heildarskuldir Ítalíu, þriðja stærsta hagkerfis evrusvæðisins á eftir því franska og þýska, eru tæplega 2.000 milljarðar evra. Þar af eru 190 milljarða evra á gjalddaga á næsta ári og í ljósi slæmra vaxtakjara þá óttuðust margir að landið gæti hreinlega ekki endurfjármagnað lánin áður en þau féllu á gjalddaga. Aðstoð Seðlabanka Evrópu tryggir að landið getur staðið við sitt og fær svigrúm til þess að gera ríkisfjármál sín sjálfbær.