Bjarki Diego vann skattamál í Hæstarétti

Hæstiréttur Íslands sneri við dómi Héraðsdóms Reykjavíkur í máli Bjarka Diego, fyrrverandi framkvæmdastjóra hjá Kaupþingi, gegn íslenska ríkinu. Héraðsdómur hafði áður staðfest úrskurð skattayfirvalda sem kröfðust þess að samningar sem Bjarki gerði meðan hann var starfsmaður Kaupþings yrðu skattlagðir sem launatekjur en ekki sem fjármagnstekjur. Líta bæri á undirliggjandi ráðstafanir sem sölurétturinn tryggði sem kaupréttartekjur.

Bjarki hafnaði málatilbúnaði skattayfirvalda og stefndi íslenska ríkinu vegna úrskurðarins.. Hann fullyrti fyrir Héraðsdómi Reykjavíkur að samningar sem hann gerði á árunum 2001 og 2003 um kaup á hlutabréfum í Kaupþingi væru í grundvallaratriðum ólíkir kaupréttarsamningum. Máli sínu til stuðnings vísaði hann meðal annars til þess að stjórnendur bankans hefðu ætlast til þess að bréfin yrðu í hans eigu á meðan að hann starfaði hjá bankanum. Hreiðar Már Sigurðsson, sem var aðstoðarforstjóri Kaupþings þegar samningarnir voru gerðir, bar vitni í málinu fyrir héraðsdómi. Hann tók undir rök Bjarka og sagði að stjórnendur bankans hefðu ekki ætlast til þess að hann, eða aðrir starfsmenn Kaupþings sem gerðu svipaða samninga og Bjarki á árunum 2001 - 2003, seldu bréfin. Héraðsdómur féllst ekki á forsendur Bjarka.

Hæstiréttur segir að í málinu hafi verið vísað til þess að hlutabréfakaup Bjarka hefðu ekki orðið endanleg fyrr en við lok tímabilsins þegar Bjarki mátti neyta söluréttarins og að þá yrði að telja Bjarka til tekna mismuninn á markaðsverði hlutabréfanna á því tímamarki og umsömdu kaupverði. Að mati Hæstaréttar stóðst þessi forsenda ekki, enda hafði eignarréttur að hlutabréfunum færst yfir til Bjarka og Kaupþingi verið greitt kaupverð fyrir bréfin við upphaf samningssambandsins.

Hæstiréttur  felldi úr gildi úrskurð ríkisskattstjóra og var íslenska ríkinu gert að greiða Bjarka það sem hann hafði greitt í kjölfar úrskurðarins, eða um 45 milljónir króna með vöxtum.