Útlit fyrir að sjötíu milljarðar tapist vegna gjaldþrots Samsonar

Aðeins sex til tíu prósent fást upp í áttatíu milljarða króna kröfur í þrotabú Samsonar, eignarhaldsfélags Björgólfsfeðga, segir skiptastjóri þrotabúsins. Það jafngildir því að rúmlega sjötíu milljarðar króna tapist vegna gjaldþrotsins.



Samson, eignarhaldsfélag Björgólfsfeðga, hélt utan um eignarhlut þeirra í Landsbankanum. Félagið var lýst gjaldþrota fyrir tveimur árum síðan og óvíst er hversu langan tíma skiptin á þrotabúinu munu taka.



Feðgarnir veðsettu hlut sinn í Landsbankanum erlendum sem innlendum lánardrottnum, en heildarkröfur í þrotabúið nema áttatíu milljörðum króna. Þar eru stærstu kröfuhafarnir suður-afríski bankinn Standard Bank með kröfu upp á 27 milljarða króna. Þýski bankinn Commerzbank ásamt öðrum kemur þar á eftir með kröfu upp á 25 milljarða króna. Og íslenskir lífeyrissjóðir með kröfur upp á tíu milljarða króna. Þá er skilanefnd Glitnis með kröfu upp á sex milljarða króna.



Lífeyrissjóðir, stórir sem smáir, keyptu skuldabréf félagsins fyrir um 10 milljarða króna. Þar á meðal eru stærstu lífeyrissjóðir landsins, Lífeyrissjóður verzlunarmanna, Lífeyrissjóður starfsmanna ríkisins (LSR) og Gildi lífeyrissjóður.



Að sögn Helga Birgissonar, skiptastjóra þrotabúsins, er búist við að 6-10 prósent fáist upp í almennar kröfur, en það jafngildir því að rúmlega 70 milljarðar króna tapist vegna gjaldþrots félagsins.



Þrotabúið höfðaði fimm mál gegn Björgólfi Guðmundssyni sjálfum og tengdum félögum vegna viðskipta sem áttu sér stað áður en Samson fór í greiðslustöðvun.



Dómkvaddir matsmenn meta hlutinn í Árvakri

Þrotabúið stefndi Straumi Equities vegna viðskipta sem áttu sér stað 25. júní 2008 með hlutabréf í eignarhaldsfélaginu MGM en eina eign þess félags var 16,7 prósenta hlutur í Árvakri, útgáfufélagi Morgunblaðsins. Svo virðist sem Samson hafi keypt hlutabréfin á yfirverði og vill þrotabú Samsonar rifta kaupunum og að því verði endurgreitt kaupverðið. Að beiðni þrotabús Samsonar voru dómkvaddir matsmenn til að skoða og meta verðmæti hlutarins í Árvakri. Að sögn Helga Birgissonar bíður þrotabúið nú niðurstöðu matsins.



Þá stefndi þrotabúið Samsonar félaginu Samson Global í Lúxemborg, sem einnig var í eigu Björgólfsfeðga, til að endurheimta 109,5 milljónir evra eða um 19 milljarða króna, vegna láns. Að sögn Helga var lánið til Samson Global svokallað víkjandi lán og þess vegna „úti í kuldanum" og í raun í svipaðri stöðu og eftirstæð krafa. Helgi segir að Samson Global og kröfuhafar þess félags hafi fallist á að samþykkja hluta kröfu þrotabús Samsonar sem almenna kröfu, ekki víkjandi, og var málið þá fellt niður. „Það er verið að leysa upp Samson Global og það þarf fyrst að greiða forgangs- og veðkröfur áður en ljóst verður hvort þrotabúið fái upp í sína kröfu," segir Helgi.



Unnu mál gegn Björgólfi Guðmundssyni

Þá höfðaði þrotabú Samsonar mál gegn Björgólfi Guðmundssyni vegna þess að Samson greiddi skuld hans við minningarsjóð dóttur hans. Dómur gekk þrotabúinu í vil og er krafa þrotabús Samsonar núna krafa í þrotabú Björgólfs Guðmundssonar, að sögn Helga.



Lánum Samsonar eignarhaldsfélags, sem voru þó aðallega í formi millifærslna, til KR-sports hf., rekstrarfélags KR, var breytt í styrk til KR hinn 4. október 2008, tveimur dögum fyir setningu neyðarlaganna og þremur dögum fyrir greiðslustöðvun Samsonar. Þetta var gert sama dag og þeir urðu bikarmeistarar í knattspyrnu. Þrotabú Samsonar höfðaði mál til að fá þessum samningum hnekkt og gekk dómur í málinu þrotabúinu í vil. „Enginn árangur verður af fjárnámi þar sem KR sport er eignalaust," segir Helgi. thorbjorn@stod2.is