Páll Magnússon tekur ekki við starfinu

Páll Magnússon, nýráðinn forstjóri Bankasýslu ríkisins, mun ekki taka við starfinu. Hann tilkynnti Steingrími J. Sigfússyni fjármálaráðherra þetta í dag.

Í yfirlýsingu sem Páll hefur sent frá sér segir hann að forsendur fyrir því að hann taki við starfinu séu brostnar eftir að stjórn Bankasýslunnar sagði af sér í gær.

„Það er óvinnandi vegur fyrir hlutaðeigandi að sitja undir pólitískum afskiptum, en í raun hafa stjórnmálamenn krafist þess að lögum og reglum um opinberar ráðningar verði vikið til hliðar í málefnum Bankasýslunnar,“ segir Páll í yfirlýsingu.