Mikilvægt að Seðlabankinn klári seinni hálfleik

Greining Íslandabanka segir það mikilvægt að Seðlabankinn klári seinni hálfleik í nýboðuðu útboði á gjaldeyri í skiptum fyrir krónueignir erlendra aðila. Ekki sé kálið sopið þótt í ausuna sé komið ef Seðlabankanum tekst ekki að endurselja þeir krónueignir sem hann kaupir.

Fjallað er um málið í Morgunkorni greiningarinnar. Þar segir að ekkert liggi fyrir um seinni legg þessa fyrsta skrefs í afnámi gjaldeyrishafta. Sá leggur snýst um að selja lífeyrissjóðum löng verðtryggð ríkisbréf gegn greiðslu í gjaldeyri. Í áætlun Seðlabankans um afléttingu hafta er talað um þennan seinni legg á þeim nótum að hann muni fara fram í samhengi við þann fyrri, og því athyglisvert að ekkert skuli enn liggja fyrir um tilhögun eða tímasetningu hans.

Í bili er því staðan sú að Seðlabankinn mun að öllum líkindum leggja til andvirði 15 milljarða kr.  í gjaldeyri, á því gengi sem tekin tilboð hljóða upp á, úr gjaldeyrisforða sínum. Heildarstærð forðans var, samkvæmt gögnum frá Seðlabankanum, 759 milljarðar kr. í apríl, jafnvirði u.þ.b. 4,7 milljarða evra. Bróðurpartur forðans er hins vegar tekinn að láni með einum hætti eða öðrum. Nettó skammtíma gjaldeyrisstaða var þannig 207 milljarðar kr.  um síðustu mánaðamót. Ljóst er því að Seðlabankinn hefur takmarkaða burði til að selja gjaldeyri úr forðanum nema ná sambærilegum gjaldeyri til baka með einum eða öðrum hætti fyrr en síðar.

„Það er að mati okkar lykilatriði að einhver mynd komist fyrr en síðar á þann hluta þessa fyrsta skrefs sem snýr að lífeyrissjóðunum,“ segir í Morgunkorninu.

„Lífeyrissjóðirnir eru með þessum viðskiptum að láta eftir hluta gjaldeyriseigna sinna, sem þeir munu að öllum líkindum ekki geta aukið við að nýju á næstu árum, því í áætlun Seðlabankans er talað um að sjóðirnir muni líklega sæta meiri takmörkunum á erlendum fjárfestingum en aðrir fjárfestar á seinni stigum haftaafléttingar.“

Síðan segir að sjóðirnir vilji því skiljanlega fá nokkuð fyrir sinn snúð, og til samanburðar var undirliggjandi gengi í Avens-viðskiptum þeirra við ríkissjóð/Seðlabankann í fyrra u.þ.b. 220 kr. á evruna. Jafngildir það 38% hærra krónuverði fyrir evruna en raunin var á innlendum markaði á þeim tíma.

Áætlaðar krónueignir erlendra aðila, samkvæmt upplýsingum frá Seðlabanka, eru nú 465 milljarðar kr. og erlendar eignir lífeyrissjóða námu í lok mars 483 milljörðum kr.