Skattbyrði Íslendinga er undir meðllagi OECD ríkjanna

Heildarskattbyrði Íslendinga var minni en í 18 öðrum OECD-ríkjum árið 2009, í reynd rétt fyrir neðan meðallag.

Þetta kemur fram í nýju fréttabréfi Þjóðmálastofnunar Háskóla Íslands. Þar er fjallað í annað sinn á árinu um skattbyrði þjóðarinnar í kreppunni, árið 2009. Að þessu sinni er skattbyrði Íslendinga borin saman við skattbyrðina í öðrum OECD-ríkjum, með gögnum frá OECD.

Í fréttabréfinu segir að heildarskattbyrðin á Íslandi lækkaði úr 41,5% af landsframleiðslu árið 2006 niður í 34,1% árið 2009, á sama tíma og meðaltal OECD-ríkjanna lækkaði úr 35,4% í 34,8%.

Ef litið er á raunverulega skattbyrði einstaklinga vegna beinna skatta, greint eftir tekjuhópum, kemur í ljós að skattbyrði lágtekjufólks á Íslandi var í 15. sæti af 30 OECD ríkjum, skattbyrði meðaltekjufólks var í 10. sæti en hæsta álagning á hátekjufólk var hins vegar í 24. sæti af OECD-ríkjunum. Hún hafði hins vegar hækkað upp í 12. sæti árið 2010.

Samanburðurinn bendir til, að ástæða geti verið til að létta skattbyrði af íslensku meðaltekjufólki. Slíkum áhrifum mætti til dæmis ná með frekari hækkun barnabóta og vaxtabóta, sem myndi einnig rétta við hlut fjölskyldna með mikinn skuldavanda.