Skuldatryggingaálag Íslands helst stöðugt

Skuldatryggingaálag á evruskuldir Ríkissjóðs Íslands hefur verið nokkuð stöðugt upp á síðkastið. Í lok dags í gær stóð álagið í 246 punktum (2,46%) samkvæmt gögnum úr Bloomberg-gagnaveitunni og hafði lækkað lítillega frá deginum áður þegar það stóð í 254 punktum.

Þetta kemur fram í Morgunkorni greiningar Íslandsbanka. Þar segir að á sama tíma í fyrra stóð áhættuálagið í 456 punktum en sem kunnugt er hefur það lækkað verulega síðasta árið. Ekki er hægt að segja sömu sögu um áhættuálagið á öðrum ríkjum Vestur Evrópu sem hefur í flestum tilfellum hækkað, sér í lagi þeirra evruríkja sem kastljósið hefur beinst að síðasta árið vegna bágrar stöðu ríkisfjármála innanlands.

Á sama tímabili og áhættuálagið á Ísland hefur lækkað um rúma 200 punkta hefur meðaláhættuálagið á ríki Vestur Evrópu þannig hækkað um 100 punkta en það stóð í lok dags í gær í 194 punktum.

Þrátt fyrir ofangreinda þróun er áhættuálagið á Ísland með því hæsta sem gerist á meðal ríkja Vestur Evrópu sem seldar eru skuldatryggingar fyrir. Áhættuálagið var hærra á aðeins þremur öðrum ríkjum í lok dags í gær, þ.e. Grikklandi (964 punktar), Írlandi (570 punktar) og svo Portúgal (470 punktar).

Skuldatryggingaálagið á Spán (241 punktar) var svo í fimmta sæti á þessum lista og í sjötta sæti var svo álagið á Ítalíu (171 punktar). Lægst er skuldatryggingaálagið á hin Norðurlöndin, auk Sviss, og eru Norðmenn þar, líkt og oftast er raunin, með yfirburðastöðu. Álagið á norska ríkið í lok dags í gær nam aðeins 19 punktum, að því er segir í Morgunkorninu.

Hér má bæta við að mikill munur er á mælingu álagsins samkvæmt Bloomberg (CMA) og Markit iTraxx vísitölunnar sem einnig mælir skuldatryggingaálög. Samkvæmt síðustu mælingu Markit iTraxx var íslenska álagið 281 punktur.