Veltan eykst og meðalverð hækkar á fasteignamarkaðinum

Fjöldi þinglýstra kaupsamninga á höfuðborgarsvæðinu í síðustu viku var 87. Þetta er nær sami fjöldi og nemur meðaltalinu á viku undanfarnar 12 vikur sem er 88 samningar. Hinsvegar hefur heildarveltan aukist og meðalupphæð á samning hefur hækkað.

Fjallað er um málið á vefsíðu Þjóðskrár Íslands. Þar kemur fram að af þessum 87 kaupsamningum var 71 samningur um eignir í fjölbýli, 13 samningar um sérbýli og 3 samningar um annars konar eignir en íbúðarhúsnæði. Heildarveltan var tæpir 3 milljarðar króna og meðalupphæð á samning 33,3 milljónir króna.

Til samanburðar hefur veltan verið að meðaltali tæpir 2,8 milljarðar kr. á viku s.l. 12 vikur og  meðalupphæðin hefur verið 31,5 milljónir kr.

Í síðustu viku var 4 kaupsamningum þinglýst á Suðurnesjum. Þar af voru 3 samningar um eignir í fjölbýli og1 samningur um sérbýli. Heildarveltan var 60 milljónir króna og meðalupphæð á samning 14,9 milljónir króna.

Á sama tíma var 8 kaupsamningum þinglýst á Akureyri. Þar af voru 3 samningar um eignir í fjölbýli, 3 samningar um sérbýli og 2 samningar um annars konar eignir en íbúðarhúsnæði. Heildarveltan var 177 milljónir króna og meðalupphæð á samning 22,2 milljónir króna

Á sama tíma var 5 kaupsamningum þinglýst á Árborgarsvæðinu. Þar af voru 4 samningar um sérbýli og 1 samningur um annars konar eignir en íbúðarhúsnæði. Heildarveltan var 102 milljónir króna og meðalupphæð á samning 20,3 milljónir króna.