Olíuverðið gæti farið í 200 til 300 dollara á tunnuna

Zaki Yamani fyrrum olíumálaráðherra Saudi Arabíu á tímum kalda stríðsins á síðustu öld segir að landið sé tifandi tímasprengja.

Yamani lét þessi orð falla á ráðstefnu í vikunni og bætti því við að ef þessi sprengja myndi springa svipað og gerst hefur í Túnis og Egyptalandi færi olíuverðið í 200 til 300 dollara á tunnuna.

Yamani bar ábyrgð á olíumálum Saudi Arabíu árin 1962 fram til 1986. Á tímum olíukreppunnar í upphafi áttunda áratugarins var hann talinn einn valdamesti maður heimsins.

Árið 1975 tók hryðjuverkamaðurinn Carlos eða Sjakalinn Yamani og fleiri OPEC ráðherra sem gísla. Sjakalinn hafði skipanir um að drepa Yamani en sleppti honum á lífi.

Í viðtali við Reuters segir Yamani að þótt engin alvarleg vandræði séu í sjónmáli í Saudi Arabíu í augnablikinu kraumi pólitísk óánægja undir yfirborðinu og hún geti brotist út hvenær sem er.