Samherji í viðræðum um kaup á Olís

Samherji er í miðjum samningaviðræðum um að kaupa stóran hlut í Olís í samstarfi við aðra fjárfesta. Þetta staðfestir forstjóri Samherja.

FAD 1830 er móðurfélag Olís, en félagið í jafnri eigu þeirra Gísla Baldurs Garðarssonar lögmanns og Einars Benediktssonar, forstjóra Olís. Félagið skipti nýlega um nafn og hefur ekki skilað ársreikningi frá árinu 2007.

FAD 1830 ehf. fékk 625 milljónir króna í arð frá Olís vegna ársins 2007 þótt Olís hafi skilað tapi upp á sex milljarða árið sem arðurinn var greiddur út. Eigið fé Olís er 1,7 milljarðar króna en fyrirtækið skuldar alls sextán milljarða.

Samherji hefur um árabil verið meðal stærstu viðskiptavina Olís. Að undanförnu hafa eigendur félagsins FAD 1830 ehf., sem er móðurfélag Olís, verið í viðræðum við aðkomu nýrra hluthafa að rekstri Olís vegna erfiðrar skuldastöðu FAD 1830 ehf. við Landsbankann.

Þorsteinn Már Baldvinsson, forstjóri Samherja, staðfestir að samningaviðræður standi yfir um kaup Samherja á hlut í Olís.

„Það hafa verið viðræður við okkur um að eignast hlut í félaginu en það er gegn því að þónokkuð margir nýir hluthafir komi að (Olís). Það er ekki frágengið og verður ekki endanleg niðurstaða í því máli fyrr en á nýju ári," segir Þorsteinn Már.

Ef Samherji á aðkomu að endurskipulagningu Olís þá verður það í samstarfi við stóran hóp hluthafa? „Allaveg þónokkur fyrirtæki, já."

Samkvæmt upplýsingum fréttastofu verða núverandi eigendur áfram í hluthafahópi Olís ef þetta gengur eftir, en þó með minni hlut en áður.

Hvers vegna hafið þið áhuga á Olís. Fyrir utan þá augljósu ástæðu að þið kaupið mikið af olíu? „Við höfum verið stórir viðskiptavinir Olís mjög lengi. Reyndar höfum við verið í viðskiptum við fyrirtækið frá því við hófum útgerð. Þannig að við berum góðan hug til félagsins." thorbjorn@stod2.is