Aftur fjörkippur á fasteignamarkaðinum

Fjöldi þinglýstra kaupsamninga á höfuðborgarsvæðinu í síðustu viku var 105. Þetta er umtalsverð fjölgun frá vikunni á undan þegar 79 samningum var þinglýst. Undanfarnar 12 vikur hefur 99 samningum verið þinglýst að meðaltali í hverri viku að því er segir á vefsíðu Þjóðskrár Íslands.

Af þessum 105 samningum  voru 77 samningar um eignir í fjölbýli, 18 samningar um sérbýli og 10 samningar um annars konar eignir en íbúðarhúsnæði. Heildarveltan var 3,1 milljarður króna og meðalupphæð á samning 29,6 milljónir króna.  Veltan og meðalupphæðin eru svipuð og verið hefur að meðaltali á viku síðustu 12 vikurnar.

Í síðustu viku var 5 kaupsamningum þinglýst á Suðurnesjum. Þar af var 1 samningur um eignir í fjölbýli, 3 samningar um sérbýli og 1 samningur um annars konar eignir en íbúðarhúsnæði. Heildarveltan var 72 milljónir króna og meðalupphæð á samning 14,4 milljónir króna.

Á sama tíma var 7 kaupsamningum þinglýst á Akureyri. Þar af voru 4 samningar um eignir í fjölbýli og 3 samningar um sérbýli. Heildarveltan var 155 milljónir króna og meðalupphæð á samning 22,1 milljón krónur.

Á sama tíma var 2 kaupsamningum þinglýst á Árborgarsvæðinu. Þar af var 1 samningur um sérbýli og 1 samningur um annars konar eignir en íbúðarhúsnæði. Heildarveltan var 23 milljónir króna og meðalupphæð á samning 11,3 milljónir króna.