Moody´s staðfestir lánshæfiseinkunn ÍLS

Matsfyrirtækið Moody´s hefur staðfest lánshæfiseinkunn Íbúðalánasjóðs (ÍLS) sem Baa3 eða  lægsta stig fjárfestingarflokks, en með neikvæðum horfum.

Í áliti Moody´s sem fylgir með tilkynningu um lánshæfiseinkunn Íbúðalánasjóðs segir að einkunnin taki mið af lánshæfi íslenska ríkisins enda er sjóðurinn ríkistryggður. Þannig séu neikvæðar horfur á einkunninni í takt við mat Moody´s á ríkissjóði.

Moody´s nefnir að tap Íbúðalánasjóðs hafi numið 34,5 milljörðum króna á síðasta ári en á móti hafi ríkið lagt sjóðnum til 33 milljarða króna í nýju eigin fé. Þrátt fyrir þetta framlag sé eiginfjárhlutfall sjóðsins aðeins 2,4%. Hlutfallið sé veikt  samanborið við aðra álíka sjóði í norðanverðri Evrópu. Moody´s segir langtímamarkmið Íbúðalánasjóðs að ná 5% eiginfjárhlutfalli. Til þess þurfi líklega frekari milljarða framlög úr ríkissjóði.

Þá kemur fram að hrakandi efnahagur íslenska hagkerfisins á liðnum árum hafi leitt til verulegrar aukningar á vanskilum húsnæðislána meðal almennings. Hátt atvinnuleysi hafi svo aukið þann vanda. Matsfyrirtækið gerir ráð fyrir að það ástand verði viðvarandi á næstu árum.