Gríðarlegur áhugi á Högum

Áhugi fjárfesta á að eignast hlut í Högum virðist vera gríðarlegur. Gengið hefur hækkað snarlega frá því að bréfin voru skráð í Kauphöll Íslands í morgun. Bréfin voru seld á 13,5 á hlut fyrr í desember en gengi þeirra hefur verið í um sextán krónum það sem af er degi.

Þetta er fyrsta skráning fyrirtækis í Kauphöllina frá því snemma á árinu 2008, eða í tæp fjögur ár. Páll Harðarson, forstjóri Kauphallarinnar, sagði við fréttastofu í gær að sá áhugi sem væri fyrir hlutabréfum í Högum yki bjartsýni fólks á markaðnum. Fjöldi fyrirtækja hefði hug á skráningu á markað á næstu mánuðum og árum. Nefndi hann þar sem dæmi Horn, dótturfélag Landsbankans, auk fleiri fyrirtækja.

30% hlutur í Högum var seldur eignarhaldsfélaginu Búvöllum fyrir ári síðan og var sá hlutur seldur á genginu 10. Búvellir keyptu svo 10% til viðbótar fyrir fáeinum vikum á genginu 11. Það er því ljóst að þeir sem standa að baki félaginu, sem eru fjárfestarnir Árni Hauksson, Hallbjörn Karlsson auk fjárfestingasjóða, hafa ávaxtað pund sitt vel.