Vopnafjörður seldi fyrir hálfan milljarð

Vopnarfjarðarhreppur hefur selt hlut sinn í útgerðarfyrirtækinu HB Granda fyrir tæplega hálfan milljarð króna. Sveitarstjóri hreppsins segir söluna styrkja fjárhag sveitarfélagsins verulega.

Sala sveitarfélagsins á hlutnum gekk í gegn sl. föstudag, en samanlagður hlutur hreppsins og Skiphólma ehf., félags í eigu hans, nam um 2,5 prósentum af heildarhlutafé. Allt það hlutafé hefur nú verið selt á tæplega 480 milljónir króna, að því er Þorsteinn Steinsson, sveitarstjóri hreppsins, staðfesti við fréttastofu í dag.

Samkvæmt fundargerð Vopnafjarðarhrepps frá 29. nóvember sl. var það verðbréfafyrirtækið Virðing sem nálgaðist hreppinn með sölu á bréfunum í huga. Viðskiptin voru síðan samþykkt í kjölfarið. Ekki liggja enn fyrir upplýsingar um hver keypti bréfin en það mun vafalítið skýrast í vikunni þegar nýr listi yfir tuttugu stærstu hluthafa verður birtur í Kauphöll Íslands.

Sveitarfélagið selur hlut sinn á genginu 12,1 en samkvæmt ársreikningi Vopnafjarðarhrepps var hluturinn bókfærður á genginu 6. Salan mun styrkja fjárhag sveitarfélagsins verulega en heildar vaxtaberandi skuldir þess í lok síðasta árs, samkvæmt ársreikningi, voru um 940 milljónir króna.

Þó sveitarfélagið selji eignarhlut sinn í Granda þá hagnast það áfram á starfsemi félagsins á Vopnafirði, sem hefur gengið vel undanfarin misseri, ekki síst vinnslan á Makríl.

Arion banki á þriðjungshlut í Granda eftir að Ólafur Ólafsson missti hlut sinn til bankans. Sé mið tekið af þessum viðskiptum er virði hlutarins um 6,6 milljarðar króna og heildarvirði félagsins um 19,8 milljarðar króna.