Karl Wernersson gæti þurft að endurgreiða hundruð milljóna

Hæstiréttur hefur fellt úr gildi ákvörðun Héraðsdóms Reykjavíkur sem vísaði á dögunum frá kæru þrotabús Milestone gegn Karli Wernerssyni, sem var aðaleigandi Milestone.

Málið varðar riftun á greiðslum frá í september 2007 þar til í febrúar 2009. Þrotabúið krafðist að rúmlega 500 milljóna króna greiðslum til Karls á þessu tímabili yrði rift. Héraðsdómur vísaði kröfunni frá, á þeirri forsendu að málið væri fyrnt.

Hæstiréttur komst í dag að þeirri niðurstöðu að það álitamál hvort fyrningarfrestur væri liðinn sé ágreiningsmál sem þurfi að leiða til lykta við efnisúrlausn málsins. Héraðsdómur Reykjavíkur skuli því taka málið til efnismeðferðar.