Promens greiðir konum 26 milljónir vegna kynferðislegrar áreitni

Plastframleiðslufyrirtækið Promens hefur samið um að greiða fjórum konum, sem störfuðu hjá fyrirtækinu, 26 milljónir króna í miskabætur vegna kynferðislegrar áreitni sem þær urðu fyrir af hálfu yfirmanns fyrirtækisins í Chicago í Bandaríkjunum.

Samkvæmt vefsíðunni Business management daily kærðu konurnar fyrirtækið vegna áreitni mannsins á síðasta ári. Kynferðislega áreitnin hófst árið 2007. Maðurinn á að hafa boðið þeim fríðindi innan fyrirtækisins gegn kynlífi. Þegar þær höfnuðu því voru þær reknar.

Þá kom einnig fram í stefnu kvennanna að þeim hefði verið hafnað um betur launuð störf sem þær sóttu um, þar sem þau áttu að vera frátekin fyrir karlmenn.

Promens rekur ekki lengur verksmiðjuna í Bandaríkjunum en ef þeir ákveða að opna verksmiðjuna á ný innan þriggja ára, þurfa allir yfirmenn hennar að gangast undir sérstaka fræðslu vegna kynferðislegrar áreitni á vinnustað. Maðurinn sem varð uppvís af hinni ósæmilegu hegðun hefur verið rekinn.

Promens rekur 45 verksmiðjur víða um heim en áður hét fyrirtækið Sæplast.