Íslensk hugbúnaðarlausn seld til 45 landa

Hugbúnaðarfyrirtækið TM Software, dótturfélag Nýherja, hefur selt eigið tímaskráningar- og verkbókhaldskerfi til rúmlega eitt þúsund viðskiptavina í yfir 45 löndum á aðeins þremur árum. Meðal viðskiptavina eru fjölmörg stórfyrirtæki og stofnanir, m.a. Kauphöllin í Lundúnum, Deutsche Bank og Intel. Öll sala á kerfinu á sér stað í gegnum netið.

Í tilkynningu segir að kerfið sem heitir Tempo, sé viðbót við verkbeiðna- og þjónustukerfið JIRA frá ástralska hugbúnaðarfyrirtækinu Atlassian og gerir notendum kleift að tengja við tímaskráningar og koma í veg fyrir tvískráningar beiðna og reikninga. Tempo veitir meðal annars aukna yfirsýn yfir mannafla og áætlanagerð, auðveldar tímaskráningar og hefur yfir að ráða ferli yfir inneimtu og tengimöguleika við önnur kerfi svo dæmi séu tekin.

Pétur Ágústsson vörustjóri Tempo hjá TM Software segir að sala á Tempo leyfum hafi margfaldast á milli ára. Aukningin er framar vonum en markaðsherferðin og sala hefur einungis farið fram í gegnum netið. „Við erum því afar ánægð með árangurinn,“ segir Pétur.