Leita samstarfsaðila í Lundúnum

Kannað verður hvort íslensk fyrirtæki eigi möguleika á verkefnum tengdum nýbyggingum og viðhaldi húsnæðis í Lundúnum og nágrenni í sérstakri könnunarferð sem verður farin í byrjun desember. Það er Íslandsstofa sem skipuleggur ferðina, en í henni verður lögð áherslu á að þátttakendur hitti verktaka, arkítekta og aðra sérfræðinga, bæði með heimsóknum á byggingarsvæði og á skipulögðum fyrirtækjafundum.

Hermann Ottósson, forstöðumaður Markaðsþróunar Íslandsstofu, segir að unnið hafi verið að því að undanförnu að aðstoða arkitektafyrirtæki í Noregi og Kanada við að afla sér verkefna. Það hafi gengið vel og nokkur íslensk fyrirtæki séu þegar með 90% af sinni veltu erlendis frá. Mikilvægt sé að efla enn frekar markaðsstöðu íslenskra fyrirtæki erlendis til þess að bregðast við þeim sveiflum sem eru í markaðnum hérlendis.

Hermann segir að mörg íslensk fyrirtæki, bæði arkitektar og verktakar, búi yfir þekkingu sem sé eftirsóknarverð erlendis. Í Lundúnum sé, að margra mati samankomið mikð af ríkasta fólki heims. „Þarna er fólk að láta betrumbæta húsnæðið sitt og þarna er norræn hönnun að verða ákveðið tískufyrirbrigði. Og þar kunnum við til verka. Við eigum mikið af norrænt menntuðum arkitektum og við eigum fagfólk í smíði og almennt á byggingasviðinu sem kann að vinna á þessu sviði,“ segir Hermann.

Hermann segir að í ferðinni verði kannað hvort menn í Bretlandi séu hugsanlega tilbúnir í samstarf með íslenskumfyrirtækjum. „Það er ekki verið að leita verkefna. En við erum að leita að mögulegum samstarfsaðilum sem vildu nýta sér þekkingu og reynslu íslensku fyrirtækjanna og hugsanlega fengið þá til að annast ákveðna verkþætti í verkefnum sem þeir eru með eða vilja bjóða í,“ segir Hermann.