Jóhanna Waagfjörð ráðin forstjóri Pennans

Jóhanna Waagfjörð hefur verið ráðin forstjóri Pennans á Íslandi ehf. Jóhanna var framkvæmdastjóri fjármála og rekstrar hjá Pennanum frá febrúar á þessu ári.

Í tilkynningu segir að Jóhanna sé þjóðhagfræðingur og MBA að mennt og starfaði um árabil sem fjármálastjóri Haga. Þar áður starfaði Jóhanna m.a. sem fjármálastjóri hjá Scandsea International AB og hjá Fjárfestingarbanka atvinnulífsins.

Jafnframt verða breytingar á stjórn Pennans. Jón Garðar Hreiðarsson tekur sæti í stjórn félagsins og verður stjórnarformaður. Jón Garðar er MBA og hefur starfað sem rekstrar- og stjórnunarráðgjafi frá árinu 1997, fyrst sem meðeigandi hjá KPMG en í eigin félagi frá árinu 2004.

Breytingar á yfirstjórn félagsins nú eru liður í undirbúningi á sölu félagsins sem fyrirhuguð er á fyrri hluta næsta árs en félagið er í eigu Eignabjargs ehf., sem er dótturfélag Arion banka.

Jóhanna Waagfjörð tekur við starfinu af Helga Júlíussyni sem verið hefur forstjóri Pennans frá árinu 2009 og leitt endurskipulagningu þess. Í dag er staða Pennans sterk og rekstur þess í samræmi við áætlanir. Stjórn Pennans þakkar Helga vel unnin störf og óskar honum góðs gengis.