Rannsóknarnefnd þarf líklega lengri tíma

Rannsóknarnefnd Alþings um starfsemi Íbúðalánasjóðs, sem tók til starfa í haust, mun líklega þurfa lengri tíma til þess ljúka störfum sínum en þá sex mánuði sem Alþingi setti nefndinni sem tímaramma þegar hún tók til starfa.

Þetta segir Sigurður Hallur Stefánsson, fyrrverandi héraðsdómari, og formaður rannsóknarnefndar um starfsemi Íbúðalánasjóðs. Formlegar skýrslutökur nefndarinnar hefjast að öllum líkindum ekki fyrr en eftir áramót, en gagnaöflun og úrvinnsla úr gögnum er í fullum gangi og hef gengið vel, segir Sigurður Hallur. Hann segir vinnuna yfirgripsmikla og að vanda þurfi til verka, en um leið að vinna eins hratt og mögulegt sé.

Með Sigurði Halli í nefndinni eru Kirstín Flygenring hagfræðingur og Jón Þorvaldur Heiðarsson, lektor við viðskiptafræðideild Háskólans á Akureyri.

Nefnd á vegum Alþingis sem hefur fall sparisjóðakerfisins til rannsóknar hefur einnig hafið störf að fullu en að sögn Sigríðar Ingvarsdóttur, héraðsdómara og formanns nefndarinnar, eru formlegar skýrslutökur ekki hafnar enn. Úrvinnsla úr gögnum hefur þó gengið vel.

Auk Sigríðar eru Tinna Finnbogadóttir hagfræðingur og Bjarni Frímann Karlsson, lektor við viðskiptafræðideild Háskóla Íslands í nefndinni. Nefndin á að ljúka störfum innan árs, samkvæmt kröfu Alþingis.

Nefndirnar tóku ekki formlega til starfa fyrr en 26. ágúst sl. á grundvelli þingsályktunartillögu sem samþykkt var á Alþingi í desember 2010.