Ágreiningi um 1,2 milljarða kröfu vísað frá dómi

Héraðsdómur Reykjavíkur vísaði frá dómi í dag 1,2 milljarða króna kröfu Reykjavíkurborgar á hendur Landsvaka, dótturfélagi Landsbankans, vegna hlutdeildarskirteina í Peningabréfum Landsbankans. Peningabréf voru einn af sjóðum Landsvaka. Þegar sjóðnum var slitið rétt eftir hrun Landsbankans fékk Reykjavíkurborg einungis greiddar tæpar 69% af eign sinni hjá Landsvaka.

Vegna þeirrar rýrnunar sem hafði orðið á eign Reykjavíkurborgar í sjóðnum lýsti borgin kröfu í þrotabú Landsbankans við slitameðferð. Kröfunni var hafnað og var ágreiningi um kröfuna vísað til Héraðsdóms Reykjavíkur. Það ágreiningsmál er rekið fyrir Héraðsdómi Reykjavíkur en því hefur verið frestað ítrekað frá því það var þingfest í júní í fyrra.

Í frávísunarúrskurði Héraðsdóms Reykjavíkur frá því í dag segir að krafa Reykjavíkurborgar í því máli sem vísað var frá í dag byggi á sömu málsástæðu og krafa í fyrrgreindu máli. Það er að starfsmenn eignastýringarsviðs Landsbanka Íslands hafi með saknæmum hætti valdið stefnanda tjóni sem Landsvaki beri bótaábyrgð á ásamt bankanum.

Kolbrún Sævarsdóttir héraðsdómari segir að Reykjavíkurborg hafi stefnt Landsvaka tvisvar vegna sömu kröfunnar. Hún bendir á í dómnum að í lögum um meðferð einkamála segi að þegar mál hafi verið þingfest verði dóms ekki krafist um þær kröfur, sem séu gerðar í því, í öðru máli. Sé dóms krafist um sömu kröfu í öðru máli skuli vísa henni frá dómi. Það er á þeirri forsendu sem Kolbrún vísar málinu frá dómi.