Aflaverðmætið jókst um tæp 7%

Aflaverðmæti íslenskra skipa jókst um rúma sex milljarða króna á fyrstu átta mánuðum ársins, eða um 6,9%. Í fyrra nam aflaverðmætið 92,4 milljörðum króna en í ár nam það 98,8 milljörðum. Þetta kemur fram á vef Hagstofunnar.

Aflaverðmæti botnfisks fyrstu átta mánuði ársins nam 60,5 milljörðum króna og dróst saman um 5,8% sé miðað við sama tímabil í fyrra. Verðmæti flatfiskafla nam tæpum 6,8 milljörðum króna fyrstu átta mánuði ársins sem er 2,9% samdráttur frá fyrra ári.

Verðmæti afla sem seldur er í beinni sölu útgerða til vinnslu innanlands nam rúmum 43 milljörðum króna og jókst um 14,9% frá því í fyrra. Aflaverðmæti sjófrystingar voru tæpir 37 milljarðar sem er 10% aukning frá fyrra ári. Verðmæti afla sem keyptur er á markaði til vinnslu innanlands nam um 13,5 milljörðum króna, sem er nær sama upphæð og í janúar-ágúst í fyrra.