Staða gjaldeyrisforðans er neikvæð um 78 milljarða

Þrátt fyrir að gjaldeyrisforði Seðlabankans hafi aldrei verið meiri í sögunni er staða hans neikvæð um 78 milljarða í dag.

Þetta kemur fram í Markaðspunktum greiningar Arion banka. Þar segir að forðinn nemi nú 985 milljörðum króna en hinsvegar nemi skuldbindingar Seðlabankans í erlendri mynt um 1.063 milljörðum króna.

Meðal annars kemur fram að um 380 milljarðar af forðanum eru að mestu innlán í eigu skilanefnda. Óðum líði að útgreiðslum skilanefnda til kröfuhafa og verður þessum fjármunum ráðstafað fyrst. Þar sem kröfuhafar eru að mestu erlendir munu þessir fjármunir hverfa úr landi.

Greiningin segir að þrátt fyrir að gjaldeyrisforðinn muni að öllum líkindum fara hratt minnkandi þá er erlend fjármögnun ríkisins í erlendri mynt að mestu trygg. Hinsvegar sé ljóst að Seðlabankinn og ríkissjóður hafi lítið svigrúm til annars á næstu árum en að ráðstafa gjaldeyrisforðanum í afborganir og vaxtagreiðslur af erlendum lánum. Lítið verði afgangs til að mæta afléttingu á gjaldeyrishöftunum.