Óraunhæft að afnema gjaldeyrishöftin á tveimur árum

Óraunhæft er að telja að hægt sé að afnema gjaldeyrishöftin á næstu tveimur árum eins og stjórnvöld stefna að. Ferlið muni taka mun lengri tíma.

Þetta er álit greiningar Arion banka en fjallað er um málið í Markaðspunktum greiningarinnar. Þar segir að stjórnvöld hafi sniðið Seðlabankanum alltof þröngan stakk með því að miða við tvö ár í afnám haftanna. Bankinn hafi sjálfur sagt að lengja þyrfti tímabil haftanna í fjögur ár í viðbót.

Nýjasta útspil Seðlabankans í afnámi haftanna er harðlega gagnrýnt en það felur í sér að hægt er að koma með aflandskrónur inn í landið ef þær eru notaðar til fjárfestinga. Áætlun Seðlabankans sé of flókin og tímafrek.

Greiningin segir stefnu stjórnvalda um að afnema höftin á næstu tveimur árum vera ótrúverðuga. Þeir fjárfestar sem þó hafa áhuga á að fjárfesta á Íslandi fyrir aflandskrónur standi frammi fyrir marga mánaða óljósu ferli áður en hægt er að hefjast handa. Ef aflandskrónuleiðin er eina útspilið í viðleitni til afnáms haftanna er langur vegur í að markmiðið náist, að því er segir í Markaðspunktunum.