Samtök iðnaðarins gagnrýna kolefnisskatt harðlega

Samtök iðnaðarins gagnrýna harðlega áform stjórnvalda um að leggja á kolefnisskatt samkvæmt ályktun sem samtökin samþykktu.

Þar segir að kolefnisskattur af þessu tagi skerðir verulega samkeppnishæfni íslensks iðnaðar og eigi sér enga hliðstæðu í nágrannalöndunum.

Þá vilja Samtök iðnaðarins meina að líkur á frekari uppbyggingu iðnaðar á Íslandi, sem er háður notkun kolefna minnki stórkostlega, sem og geta fyrirtækja til að nýta umhverfisvænar orkuauðlindir.

Svo segir að fjárfestingaáform margra fyrirtækja séu sett í uppnám og tilverugrunni starfandi fyrirtækja er ógnað. Í húfi eru þúsundir starfa um allt land segir í tilkynningunni.

Samtök iðnaðarins hvetja svo íslensk stjórnvöld til að draga áform um kolefnisskatt til baka hið fyrsta til að lágmarka það tjón sem þegar er orðið.

Hægt er að lesa ályktunina í heild á heimasíðu samtakanna.