Gríðarleg aukning flugfarþega

Gert er ráð fyrir að tæplega 2,3 milljónir farþega fari um Keflavíkurflugvöll á næsta ári, en í fyrra voru um 1,9 milljónir farþega sem fóru um völlinn. Forsenda fyrir aukningu farþeganna er bæði að þau flugfélög sem þegar hafa flogið boða aukningu auk þess sem ný flugfélög hafa boðað komu sína á nokkrum flugleiðum milli Keflavíkurflugvallar og Evrópu.

Keflavíkurflugvöllur hefur leitað leiða til að auka fjölda farþega til Íslands meðal annars yfir vetrarmánuðina. Einnig er í þróun eins konar hvata- eða afsláttarkerfi sem miðar að því að laða að ný flugfélög utan háannatímans snemma morguns og síðdegis þegar flugstöðin annar vart umferðinni.