Uppsagnir áfall fyrir fjármálageirann - 1800 misst störf frá hruni

Íslandsbanki undirbýr nú uppsagnir starfsmanna eftir að bankinn sameinaðist BYR í gær. Formaður samtaka starfsmanna fjármálafyrirtækja er mjög ósáttur við stefnu stjórnvalda og segir nýjan launaskatt á fjármálafyrirtæki muni valda tíu prósent fækkun til viðbótar.

Alþingi samþykkti í gær sölu á hlut ríkisins í Byr til Íslandsbanka og því ljóst að bankarnir tveir munu sameinast undir merkjum Íslandsbanka. Bankinn tilkynnti í gær að sameiningin myndi kalla á uppsagnir meðal starfsmanna og samkvæmt upplýsingum frá upplýsingafulltrúa Íslandsbanka er nú verið að undirbúa með hvaða hætti það verður gert. Ekki ert ljóst hversu mörgum verður sagt upp en starfsmenn bankanna bíða nú ákvörðunarinnar uggandi.

Formaður samtaka fjármálafyrirtækja Friðbert Traustason segir þetta enn eitt áfallið fyrir greinina en um átján hundruð félagsmenn SSF hafa misst vinnuna á síðustu þremur árum.

„Íslandsbanki er búinn að segja okkur frá hvað sé á döfinni en við höfum ekki fengið neinar tölur en við vitum þó að það er alveg ljóst að það eru einhverjir tugir starfsmanna sem munu missa vinnuna," segir Friðbert.

Hann segir þetta hafa sérstaklega slæm áhrif á stöðu kvenna á vinnumarkaði þar sem þær eru stærsti hluti þeirra sem hafa misst vinnuna í fjármálafyrirtækjum.

„Þetta eru náttúrulega kvennastörf sem við megum alls ekki missa og er mjög merkilegt að ríkisvaldið skuli sérstaklega ýta undir þetta og núna með hugsanlegan nýjum launaskatti á fjármálafyrirtæki upp á 10 prósent sem þýðir ekkert annað en tíu prósent fækkun í viðbót," segi Friðbert.

Hann er mjög ósáttur við aðgerðir stjórnvalda í greininni.

„Þau ýta undir og eru með allskonar yfirlýsingar að það séu of margir að vinna í þessum störfum í dag sem er þvert á það sem fólkið sjálft upplifir því það er bókstaflega í vinnunni dag og nótt til að bjarga því sem bjargað verður í fjármálum fyrritækja og einstaklinga."