Erlendar eignir lífeyrissjóðanna halda áfram að minnka

Ástandið á erlendum fjármálamörkuðum hefur leitt til þess að erlendar eignir lífeyrissjóðanna hafa stöðugt minnkað undanfarna mánuði.

Erlendar eignir lífeyrissjóðanna skruppu saman um 15,3 milljarða kr. í september  eða sem nemur um 3,4% að nafnvirði. Þetta er fjórði mánuðurinn í röð sem erlend verðbréfaeign sjóðanna lækkar frá fyrri mánuði, og hefur hlutfall þeirra af heildareignum ekki verið lægra síðan í nóvember árið 2004. Ástæða lækkunarinnar er hinn mikli órói sem verið hefur  á erlendum fjármálamörkuðum.

Þetta kemur fram í Morgunkorni greiningar Íslandsbanka. Þar segir að erlendar eignir sjóðanna námu 438,6 milljörðum kr. eða 21,8% af hreinni eign þeirra í september. Til samanburðar má nefna að hlutfallið var 27,3% í sama mánuði í fyrra.

Stærsti hluti erlendra eigna lífeyrissjóðanna eru bundnar í erlendum hlutabréfasjóðum. Greiningin reiknar með að þessar eignir hafi hækkað að nýju í október enda hækkuðu hlutabréfavísitölur bæði vesta og austan hafs töluvert í þeim mánuði.