Íslandsbanki á hlut í 27 félögum

Í heild eiga Íslandsbanki og Miðengi hlut í 27 félögum, Íslandsbanki í 5 félögum en Miðengi í 22. Þetta kemur fram í tilkynningu frá bankanum í framhaldi frétta um að bankarnir eigi 137 félög sem eru í óskyldri starfsemi.

Í tilkynningunni segir að Miðengi ehf, eignarhaldsfélag í eigu Íslandsbanka, fari með eignarhald og umsýslu fyrirtækja í eigu bankans. Miðengi hefur lagt ríka áherslu á að vinnubrögð félagsins séu gagnsæ og starfsreglur skýrar auk þess sem lögð hefur verið áhersla á opið söluferli eigna. Stefna bankans er að selja félög sem hann hefur eignast, að hluta til eða að fullu, og eru í óskyldum rekstri.

Hafa ber í huga að í sumum tilvikum eru fleiri en ein kennitala tengd félagi og því getur verið villandi að telja kennitölur frekar en hvert félag fyrir sig. Að auki er nokkuð um að lítil starfsemi sé í félögum í eigu bankans, t.a.m. í félögum sem stofnuð hafa verið um stakar fasteignir.

11 félög eru utan um fasteignir, þar af eru 9 í Miðengi.  Þá eiga Íslandsbanki og Miðengi 10% hlut eða undir í 8 félögum en 100% hlut í 8 félögum, þar af eru 6 fasteignafélög sem sum hver hafa verið stofnuð um eina fasteign með litla sem enga starfsemi.

Stærsta einstaka rekstrarfélagið sem er í fullri eigu bankans er Jarðboranir en félagið er í söluferli hjá Miðengi.